Tu unā muabeti (virtualā) cu poeta armānamiljei, duruta Kira Mantsu, minduiam cā tuts armānjlji/rrāmānjlji di iutsido va si s-hārāseascā s-aibā un loc virtual iu cu mash un click pot s-aibā acess la yishterili a literaturāljei armāneshti.
Scriitorlji armānj, di cāra furā sh-ninga sānt ahānt rāspāndits, fārā unā pathridā a lor, tsicāra ar scrisā multi cārts, ti amārtii, aisti cārts nu mata s-aflā tu bibliotetsli natsiunali sh-locali a craturlor iu bāneadzā armānjlji/rrāmānjlji. Ama tu dzua di azā, cu tehnolgyia, cu cāljiurili di sotsializari on line, armānjlji sh-aflarā unā nau pathridā: pathrida virtualā armāneascā iu vār nu poati s-nā nkeadicā s-nā adunām, s-fitsem muabets, s-ni li-mpārtsāmu minduierili sh-dukerili tu limba atsea dultsea di dadā, s-nvitsām s-anyrāpsimu/scrirām, zburāmu limba a strāpāpānjilor a noci, s-nvitsāmu ti isturia noastā fārmācatā tsi u urfānāpsi aistā mileti cama veclji tu Epir, Tesalia, Makedonia sh-alti bilocuri. Tu aistā pathridā virtualā lipseashti s-li prumuvām tuti yishterili a cozmului cultural armānescu. Cu aisti minduieri ahurhim sh-aistā njicā Bibliotecā.
Va s-ira multu ghini ca tuts atsei tsi aru scrisā cārts s-ni li pitreacā pi adresea di mail custandini@gmail.com tu formatu word icā pdf (sh-ma multu autorlji) ta s-li avdādzem tu aistā vivliotecā s-li dgjivuseascā tuts armānjlji di tut laolu.
Lj-u bāgai numa “Vivlioteka Armāneascā” cātse cā am tu minti s-adun tu aistā frāndzā cārts anyrāpsiti/scrirati tsi mutrescu Isturia, Literatura, Poezia sh-Limba armāneascā. Niscānti cārts sānt scrirati sh-tu limba rumuneascā sh-anglikeascā. Tu tsi mutreashti scrirarea/anyrāpsearea, isturia sh-arāzga armānjlor, cathi autor ari minduierili a lui tsi nu si uidisescu unu di la alantu. Di iu yinu aisti minduier ahoryea unu di alant, cātse autorlji nu scriu/anyrāpsescu cu un alfabet standard? Apandisea lipseashti s-vā u dats voi isish dupu cum va s-vā dzācā inima.
Cārtsili sānt arādhāpsiti pi categorii:
2-Cārts ti identitati sh-isturii
3-Cārts di literaturā (prozā, poiezii sh-cāntitsi)
4-Pirmithi ti māri sh-ti njits
Vā ashtiptām cu harau s-nā adunām tu Bilioteca Armāneascā! Click ndzeanā pi Vivlioteca Armāneascā sh-tuti udadzili di cārts va si s-discljidā.